ಇಂದು

ಮನದ ಮುಚ್ಚಳ ತಗೀಬೇಕ
ಇದ್ದರಿಂದ ನಾವು ಇರಬೇಕ
ಇಂದು ಇದ್ದರ ಇದ್ದ್ಹಾಂಗ
ಇರದೆ ಹೋದರೆ ಸತ್ತ್ಹಾಂಗ

ಇಂದೇ ತಿಳಿಯದು ಮುಂದ ಕಾಣದು
ಅಂದು ನಂದಿದ ಕತ್ತಲೆಯ ನಾಡದು
ಬಂದು ನಿಂತರ ಬಾಳಿರದ ಬಾಳದು
ಬೆಂದು ಬೆಳೆದು ಬಾಳಿದರ ಬಾಳದು

ಅಂದ ಚಿಪ್ಪಿನ್ಯಾಗ ಇಂದ ಮುತ್ತೊಂದು
ಕಂಡಿತೊಂದೇ ಕ್ಷಣ ತಾ ಹೊರಬಂದು
ಕೊಂಡಿ ಕಳಚಿತೋ ಕಣ್ಗೆ ಮುತ್ತಿಗೆ
ನಿಂತು ಮುತ್ತಿತು ಮುತ್ತು ಮನಸಿಗೆ

ಹೊಳೆಯ ಹರಿವಲ್ಲಿ ಮುತ್ತು ಮಾಯವೋ?
ತಳಗ ಬಳಗದ ಸಂಗ ಸ್ನೇಹವೋ?
ಹಿಂದ ಸರಿಯಿತೋ, ಮುಂದಕ್ಹರಿಯಿತೋ?
ಒಳಗ ಒಳಗ ತಿಳೀದ್ಹಂಗ ಕಳೆಯಿತೋ?

ಕಾಲ ಕಾಲಿಗೆ ಗತಿ ದಿಕ್ಕು ಯಾವುದೋ?
ಕಾಲಕಾಲಕ್ಕೆ ಕಾಲ ಕಾಲವೋ!
ಕಾಲದೊಳಗೆ ಜಗವೆಲ್ಲ ಕಾಲವೋ!
ಕಾಲದೊಳಗೆ ಹೊಸ ಕಾಲ ಜನ್ಮವೋ!