Friday, July 13, 2007

ನಗೆಹನಿಗಳು

ಬೆಳಕು

ಬೆಳಕು

ಟೀಚರ್: ಶಬ್ದ ಮತ್ತು ಬೆಳಕುಗಳಲ್ಲಿ ಯಾವುದು ವೇಗವಾಗಿ ಚಲಿಸುತ್ತದೆ?
ಮೋಹನ: ಬೆಳಕು
ಟೀಚರ್: ಅದನ್ನು ಹೇಗೆ ಸಿದ್ಧಪಡಿಸುತ್ತಿಯ?
ಮೋಹನ: ಮಿಂಚಿದಾಗ ಅದು ನಮಗೆ ಮೊದಲು ಕಾಣುತ್ತದೆ ನಂತರ ಗುಡುಗು ಕೇಳುತ್ತದೆ.
ಟೀಚರ್: ಸರಿ
ಗುಂಡ: ನನಗನಿಸುತ್ತದೆ ಶಬ್ದವೇ ಬೆಳಕಿಗಿಂತ ವೇಗವಾಗಿ ಚಲಿಸುವುದು.
ಟೀಚರ್: ಅದು ಹೇಗೆ?
ಗುಂಡ: ನಮ್ಮ ಮನೆಯಲ್ಲಿ ನಾನು ಜನರೇಟರ್ ಶುರು ಮಾಡಿದಾಗ, ಮೊದಲು ಶಬ್ದ ಬರುತ್ತದೆ, ನಂತರ ಬೆಳಕು ಬರುತ್ತದೆ

Wednesday, July 11, 2007

!!

ಲಂಡನ್ನಿನಲ್ಲಿ
ಭಿಕ್ಷೆ ಬೇಡಲೂ ಸಹ
ಬೇಕು ಲೈಸೆನ್ಸು
ಕಟ್ಟಬೇಕು ಟ್ಯಾಕ್ಸು.

?೨

ಕಣ್ಣುಗಳು ಮೂರುಂಟು ಮುಕ್ಕಣ್ಣನಲ್ಲ
ಮೈ ಬಣ್ಣ ಬದಲಿಸುವುದು ಊಸರವಳ್ಳಿಯಲ್ಲ
ಬಣ್ಣ ಬದಲಾದಂತೆ ಜಗ ನಿಂತು ನಡೆಯುವುದು
ಬಲ್ಲವರು ಗುಟ್ಟಿದನರಿತು ಪೇಳುವರಲ್ಲ.

ಟ್ರಾಫಿಕ್ ಲೈಟು.

ಒಗಟುಗಳು

?೧
?೨

ನೀಲುಗಳು

ಪಳಿಯೊಳಿಕೆ
ಚಂಡಾಟ
!!

ಚಂಡಾಟ

ಚಂಡನಳೆದಾಡಿದ ದಾಂಡಿಗ
ಚಂಡಾಡಿ ಗಂಡುಗಲಿಯಾದ
ಚಂಡಿಗನಳೆದಾಡಿದವ
ಚರಂಡಿ ಪಾಲಾದ.

ಪಳಿಯೊಳಿಕೆ

ಮನವನುತ್ಖನಿಸಿದರೆ
ಸಿಗುವವು ಮತ್ತೆ ಮತ್ತೆ
ಅವೇ (ನೆನ)ಪಳಿಯೊಳಿಕೆಗಳು.

?೧

ಬಾಯಲ್ಲಿ ಜನರನುಗುಳಿ ನುಂಗುವುದು
ಮುಚ್ಚಿದ ಬಾಯ ಕಚ್ಚಿ ಓಡುವುದು
ಬಾಯಲ್ಲದ ಬಾಯಲ್ಲಿ ಮಾತನಾಡುವುದು
ನೆಲದ ಬಾಯೊಳು ಮುಳುಗಿ ಮಾಯವಾಗುವುದು.

-ಲಂಡನ್ ಟ್ಯೂಬ್ ಟ್ರೈನು

Sunday, May 13, 2007

ತಳಮಳ

ವೇಷಾವೇಷಗಳ ದೇಶಾದ್ವೇಷಗಳ
ಕಡಲ ಒಡಲಿನೊಳಗೆ
ಕಂಡಿತೇನದು ಕಾಣದೇನದು
ಕಣ್ಣ ಕಣ್ಣುಗಳಿಗೆ.

ನೀವು ನಿಮ್ಮಗಳ, ತಮ್ಮ ತಾವುಗಳ
ಕಡೆಗೆ ನಡಿಗೆ ಕೊನೆಗೆ
ಗಳಿಕೆಗಳಿಕೆಗಳ ಸಿಕ್ಕರೆಣಿಕೆಗಳ
ತಳಮಳವೇ ಮಳಮಳವು.

ಕಳೆಗಳಿಗೆ ಕತ್ತಿ, ಬೆಳೆಗಳಿಗೆ ಬುತ್ತಿ
ಕೊಡದೆ ಕೊಡದು ಫಲವು
ತೊರೆ ತೊರೆಯದೆ ತನ್ಹುಚ್ಚ ತಾನು
ಎಲ್ಲೆಲ್ಲೋ ಹೊಯ್ತು ಕೊಚ್ಚಿ.

ತಾನೆ ತನುವಿಗೆ ಎಲ್ಲೆ
ಎಲ್ಲಿ ಮನಕೆ ಎಲ್ಲೆ
ಮಾನ ಮನಕೆ ಮೌನವೇ ಅಲ್ಲೆ.

ರಾಧೆ

ನೀನಾರು ಸರದಾರ
ನಾ ನೀನಿತ್ತ ಮುತ್ತು
ನೀನೂರು ಹರದಾರಿ
ನಾನಿತ್ತ ಕನಸ ಹೊತ್ತು

ನೀನುಕ್ಕು ನಾನದಿರು
ನಾನಧರ ನೀಮಧುರ
ನೀತೇಜ ನಾತಾವರೆ
ಚಂದಿರನೀ ನಾತಾರೆ

ನಾರಾಧೆ ನೀನಿರದೆ
ನೀನರ್ಧ ನಾನರ್ಧ
ತಾವಿರದೆ ನಾವಿದ್ದರೆ
ಇದ್ದರೇನಿರದಿದ್ದರೇನ್?

ಉಗಮಗಾನ

ಹರಿದಿದೆ ನಾದದ ನದಿ ನಿರಂತರ
ಆದಿಯ ಒಡಲಿನಿಂದುಗಮಿಸಿ
ಕರಗಿದೆ ತಾನ ಜಗವು ತಾ ಹಿಗ್ಗಿದಂತೆ

ದಿನವಿರದೆ ಇರುಳಿರದೆ ಗಳಿಗೆಗಳ
ಗಣಿಸದೆ ಗಮನಿಸದೆ ಕಾಲಗಳ
ಅರಿವಿರದೆ ಪರಿವಿರದೆ ಇತಿಮಿತಿಗಳ
ಮೀರದಂತೆ ಮುಗುಚಿ ಮಲಗಿತ್ತು ವಿಶ್ವ.

ಕಾಲ ಮಲಗಿತ್ತು ಶೂನ್ಯದ ಮಡಿಲಲ್ಲಿ
ಗಾನ ಮಲಗಿತ್ತು ಮೌನದೊಳಗೆ
ರಾಗವೇನಿರದೆ ಜಗವು ಶವವಾಗಿರಲು
ನಾದ ತಾ ಮೆಲ್ಲಗೆ ಮೈ ಮುರಿಯುತ್ತಿತ್ತು.

ಅಮೃತ ಗಳಿಗೆ ಸಿಡಿಸಿತು ಜಗಕೆ
ಜೀವದಾನ ನಾದದುದಯ ದಿನದ
ನೃತ್ಯಾರಂಭ ಸಂಭ್ರಮಗಾನ
ಅರಳಿಮತ್ತರಳಿ ಹರಿಯಿತು ನಾದದ ನದಿ.

ತನನ ತಾನ

ತನನ ತಾನ ತಂತಾನ
ಅವನೀಗೆ ಇವನು ಬಂದಾನ
ನಾನಿಂದ ಕಂದನೆಂದಾನ
ಅಳತಾನ ಒಳಗ ನಗತಾನ

ನೆನೆಸ್ಯಾನ ಒಲವ ಹರಿಸ್ಯಾನ
ಕನಸೀಗೆ ನನಸ ಬೆಸೆದಾನ
ಮೆನಸೀಗೆ ಕನಸ ಹೊಸದಾನ
ಕರೀತಾನ ಒಳಗ ಕಿರಿತಾನ

ಭೋಗ ಭಾಗಿಸಲಿ, ಗುಣ ಗುಣಿಸಲಿ
ಯೋಗ ಕೂಡಲಿ, ಕೊಳಕ ಕಳಿಯಲಿ
ಅರಿವನರಸಲಿ ಬೆಂದು ಬೆಳೆಯಲಿ
ಇಂದಿನಿಂದೆಂದು ನಂದದಿರಲಿ
ತಾನ ತನ್ನಿಂತಾನ ನಿನಾದವಾಗಲಿ.

ಓಕುಳಿ

ಕೊಲ್ಲು ಕೊಲ್ಲೆನುತಾ
ಕೊಚ್ಚಿಹಾಕು ನೀನೆನುತ
ರೊಚ್ಚಲಿ ಚಿಮ್ಮಿಸಿ ಚೆಲ್ಲಿದರಯ್ಯೋ
ನೆತ್ತರೋಕುಳಿಯ.

ಮುಸುಲ ನೀನೆನುತಾ
ಅಸಲು ಮನುಜನಲ್ಲೆನುತ
ಕುಲವನಳಿಸಿ ಕುಣಿಯೆಂದೆನುತ
ಚೆಲ್ಲಿದರೋಕುಳಿಯ.

ಮುಂದಕಿನ್ನೆಂದೂ
ಹಿಂದು ನಂದಿಬಿಡಲೆಂದು
ಗುಂಡಿಗೆ ಬಗೆದು ಚೆಲ್ಲಿದರಯ್ಯೋ
ನೆತ್ತರೋಕುಳಿಯ.

ಟೆರೆರೆಂದು ಕಿರುಚಿ
ಖರೆಯ ಎಡೆಬಿಡದೆ ತಿರುಚಿ
ಸದ್ದಾಮದ್ದ ಮೂತಿಯ ತೋರಿ
ಎರಚಿದರೋಕುಳಿಯ.

ಕಾರು ಬಾರೆನುತ
ಬೋರು ಒಲ್ಲೆ ಲೈಫೆನುತ
ಹೋಮಿ-ಸುಯಿಸೈಡೆಂದೆನುತ
ಚೆಲ್ಲಿದರೋಕುಳಿಯ.

ಅಳಿಯದೆ ಉಳಿವವರು
ಜಗದಿ ಯಾರಯ್ಯಾ ಇಹರು
ಜಗದ ಜನಕನ ನಾಮದಿ ನಿತ್ಯ
ನೆತ್ತರೋಕುಳಿಯೊ.

ಬರಿ(Bury)

ಬರಿ ಬರಿ ನೀ ಬರಿ ಬರಿ
ಅರಳು ಹುರಿದ್ಹಾಂಗ ಹುರಿದು ಬರಿ
ನೀರು ಹರಿದ್ಹಾಂಗ ಹರಿದು ಬರಿ
ಎಲ್ಲಾ ಅರಿತ್ಹಾಂಗ ನುರಿತು ಬರಿ
ಬರಿ ಬರಿ ನೀ ಬರಿ ಬರಿ

ಮನದ ಕಥೆಯಾ ನೀ ನೋಡಿ ಬರಿ
ಕತೆಗಾರ ಹೇಳಿದ್ದನ್ನ ಕೇಳಿ ಬರಿ
ನಟನು ನಟಿಸಿದ್ಹಾಂಗ ನಟಿಸಿ ಬರಿ
ಜನಕೆ ಬೇಕೆನಿಸಿದ್ಹಾಂಗ ಜನಿಸಿ ಬರಿ
ಬರಿ ಬರಿ ನೀ ಬರಿ ಬರಿ

ಬರ ಭಾವಕ್ಕ ಬರದೆ ಬರೆದೇ ಬರಿ
ಬರಿದಾಗೂತನ ಭರ ಭರ ಬರಿ
Bury ಮಾಡೂತನ ಛಲ ಬಿಡದೆ ಬರಿ
ನಾಕ ನರಕ ಮರೆತು ಇಲ್ಲೆ ಇದ್ದು ಬರಿ
ಬರಿ ಬರಿ ನೀ ಬರಿ ಬರಿ.

Friday, May 11, 2007

ನಮ್ಮ ಜಗ

ಇರಲಿರಾಕಿಲ್ಲ ಇರಾಕಿಲ್ಲ
ನರನರಕೆಲ್ಲ ಇಲ್ಲಿರಾಕಿಲ್ಲ

ಸದ್ದಾಮದ್ದುಗುಂಡ ಕೂಡಿಹ
ನೆಂದು ಬುಸ್ ಬುಸ್ಗುಟ್ಟಿ ಕಾರಿ
ಹದ್ದು ಮೀರಿ ಯುದ್ಧ ಸಾರಿ
ಉದ್ದ ತಿಳಿಯದೆ ಹೊಳೆಗೆ ಹಾರಿ

ಸುಳ್ಳ ಕಂತೆಯೇ ಸತ್ಯವೆಂದು
ಕಳ್ಳಮನಸ್ಸಿಗೆ ತಿಳಿಸಿ ಹೇಳಿ
ಬೆಳ್ಳ ಸೇನೆಯ ಕಟ್ಟಿಕೊಂಡು
ದಳ್ಳುರಿಯ ಹಚ್ಚಿದನವನಿಗೆ

Thursday, July 13, 2006

ಜಾಲ

ಜಾಲ ಕೋಟಿ ಜಾಲ ಹೆಣಿದಿವೆ ಜಗವ
ಕುಣಿಸಿವೆ ಹಣಿಸಿವೆ ಮಣಿಸಿವೆ ಜಗವ.

ಹೆಜ್ಜಾಲ ಕಿರಿಜಾಲ ಮಾರ್ಜಾಲ
ನೂರ್ಜಾಲ ನೂರಾರ್ಜಾಲ
ಹೆಚ್ಚಲು ಕಚ್ಚಲು ಚುಚ್ಚಲು
ಸುತ್ತಲು ಮುತ್ತಲು ಎತ್ತಲೂ.

ತಂತ್ರ ಸ್ವತಂತ್ರ ಪರತಂತ್ರ
ಅಂತರ ನಿರಂತರ ಮಂತ್ರ
ಬಾನು ಭುವಿ ಭಾನು ನಕ್ಷತ್ರ
ಅಲೆಯ ಬಲೆಯಿಂದ ತಾ ಪ್ರತ್ಯಕ್ಷ.

ಮನವನಾವರಿಸಿ ಮಾನವನಾವರಿಸಿ
ಅರಿಯದೆ ಎಲ್ಲೆಲ್ಲೂ ಜಾಲ
ಅವತರಿಸಿ ನೂರಾರು ತೆರೆ ತರಿಸಿ
ಸುರಿಸಿ ಸರಸ ವಿರಸ ಸವಿರಸ.

ಜೀವ ಭಾವಾಭಾವ ನೋವ ನಲಿವ
ಉಲಿವ ಸುಲಿವ ಮನವ ತನುವ
ಕಾಮ ಕರ್ಮ ಧರ್ಮ ಮರ್ಮ
ಎಲ್ಲ ಚರ್ಮದೊಳಗಿನ ಜಾಲ
ಮಿಥ್ಯ ಜಾಲ ಮಿಥ್ಯ ಎಲ್ಲಿ ಸತ್ಯ?

ಚೆಲುವೆ

ಚೆಲುವೆ ನಿನ್ನ ಚೆಲುವ ಬೀರಲೆಂದೆ
ತಂಗಾಳಿಗೆ ಮೈಯೊಡ್ಡಿ ನಿಂತಿರುವೆಯಾ?
ಚೆಲುವ ನಿನ್ನ ಚೆಲುವ ಹೀರಲೆಂದೇ
ಅಂಗಳಕೋಡೋಡಿ ಬಂದೆಯಾ?

ಹೊಲದೊಳಗಿನ ಬೆಳೆಗಳಲ್ಲಿ ಒಂದಾಗಿ ನಿಂತೆಯಾ?
ಬೆಳೆಯೊಳಗೆ ಹಸಿರಾಗಿ ಹೊಸ ಉಸಿರ ಪಡೆವೆಯಾ?

ನಸು ನಾಚಿ ತಲೆ ತಗ್ಗಿಸಿ ಕೈ ಹೊಸೆಯುತ ನಿಂತೆಯಾ?
ಹುಸಿ ಮುನಿಸನು ತೋರುತಲಿ ಕೈ ಚಾಚಿ ಕರೆದೆಯಾ?

ಮನದಾಳದಿ ಏನಡಗಿದೆ ನೀನೆನಗೆ ತಿಳಿಸೆಯಾ?
ಮನ ಗೆದ್ದೆ ನಾ ಸೋತೆ, ಅಥವಾ ನೀನೆನಗೆ ಸೋತೆಯಾ?

ಭೂಮಿ

ಬಾಗಿಲ ಬಳಿ ಬಂದು
ಮನದ ಕದವ ತಟ್ಟಿ
ನೀನೆನ್ನ ಕಣ್ಣಿಗೆ ಕಟ್ಟಿ
ಕನಸ ಲೋಕವ ನಾ ಮುಟ್ಟಿ.

ಬೆಂದ ಭೂಮಿ ಬಿಟ್ಟು ಬಾಯಿ
ಬರದಿ ಬಿರಿದು ಕಾದ ಮೈ
ಬಾನ ಕಡೆಗೆ ಕಣ್ಣ ಚಾಚಿ
ಭರದಿ ಸುರಿಯಂದಂಗಲಾಚಿ

ಮುತ್ತ ಮಳೆಯನಿಳೆಗೆ ಸುರಿಸು
ನಿತ್ಯತೃಪ್ತ ಹೊಳೆಯ ಹರಿಸು
ಸುಪ್ತಚಿತ್ತಕೆ ಜೀವ ಬರಿಸು
ಮತ್ತ ಮತ್ತ ಮುತ್ತಿ ಹನಿಸು

ನೀನಾರು ಸರದಾರ
ನಾ ನೀನಿತ್ತ ಮುತ್ತು
ನೀನೂರು ಹರದಾರಿ
ನಾನಿತ್ತ ಕನಸ ಹೊತ್ತು

ನಾರಾಧೆ ನೀನಿರದೆ
ನಾನರ್ಧ ನೀನರ್ಧ
ತಾವಿರದೆ ನಾವಿದ್ದರೆ
ಇದ್ದರೇನಿರದಿದ್ದರೇನು.

ನೀನುಕ್ಕು ನಾನದಿರು
ನಾನಧರ ನೀಮಧುರ
ನೀನೀರು ನಾತಾವರೆ
ಚಂದಿರನೀ ನಾತಾರೆ.