ರೈಲ್ ಹಾಡು

(ಈ ಹಾಡನ್ನು ಬರೆದವರು ಯಾರೋ ನನಗೆ ತಿಳಿಯದು. ನಾ ಚಿಕ್ಕವನಾಗಿದ್ದಾಗ ನಮ್ಮ ಅಜ್ಜಿ ರಾಧಕ್ಕಮ್ಮ ಹಾಡುತ್ತಿದ್ದರು. ಈಗ ಅವರಿಲ್ಲ. ಅಮ್ಮನಿಂದ ಆಸ್ತಿಯಾಗಿ ಪಡೆದ ನಮ್ಮ ದೊಡ್ಡಮ್ಮನಿಂದ ಕೇಳಿ ಬರೆದದ್ದನ್ನು ಬರೆದಿರುವೆ. ಅಲ್ಲಲ್ಲಿ ತಪ್ಪಿರಬಹುದು. ಮುಂದೊಮ್ಮೆ ಅವನ್ನು ಸರಿಪಡಿಸುವೆ - ದೊಡ್ಡಮ್ಮನನ್ನು ಭೇಟಿಯಾದಗ.)

ಸಾರಿ ಹೇಳುವೆನು ನಾನು ವೀರ ಮಾರುತಿ ದೈತ್ಯ ಫಿರಂಗೇರು ಮಾಡಿದಂತ ಚಮತ್ಕಾರ
ಕೂರ ದೈತ್ಯನ ಮರ್ಜಿನ ಪಾರುಮಾಡು ಎಂದು ನಾ ಮುಗಿದು ಬೇಡುವೆನು ಭಯಕರ
ರೈಲು ವಿಸ್ತಾರವನು ಇನ್ನು ಮುಂದೆ ಹೇಳುವೆನು ಕೈಲಾದ ಮಟ್ಟಿಗೆ ಕೇಳ್ರಿ ಪೂರ
ಸಾಲಗಾಡಿ ಮಾಲಗಾಡಿ ರೂಲಗಾಡಿ ಪೂಲಗಾಡಿ ಗೂಡಸ ಕರ್ನಾಟಕ ಹಲವು ತರ

ಧದಿಗಿಂದ ಗಾಡಿ ಕದಿಯಿಂದ ಓಡುವಾಗ ಕಿವಿಯೊಳಗ ಗಾಳಿ ಬರರರ
ಗಡಗಡಗಡ ಎಂದು ಶಬ್ದ ಮಾಡುತದೆ ಇಂದ್ರ ವೇಗದತ್ತೆ ಝೇಂಕಾರ
ಒಂದು ತಾಸಿಗೆ ನೂರು ಮೈಲು ಚಲಿಸುವುದು ಕೇಳಿ ಈ ರೈಲು
ವಾಯುಯೋಗ ಮನೋಯೋಗ ಸುಸ್ತಾರ ಮಾಡಿಬಿಟ್ಟಿರುವರು ಹರಹರ

ಮುಂದಿನ ಬಂಡಿಯೊಳಗಿನ ಕೀಲು ತಿರುವಿ ಬಿಟ್ಟರು ಹಿಡಿಯುವುದು ದಿಗಿಲು
ಧ್ವನಿ ಮಾಡಿ ಕೂಗುವುದು ಕಲಲಲ ಎಂಥಾ ಬುದ್ಧಿ ಕೊಟ್ಟರು ಅಮಲೋಲ
ಪುತ್ರವಂತಿ ಕೇಳಿ ವಿಚಿತ್ರವಾದನಲ್ಲ ಸೂತ್ರವ ನೋಡಿ ಎನ್ನ ಮನಕೆ
ಯಜ್ಞವಂತಿ ಕೇಳು ಮಗ್ನನಾದೆನಲ್ಲ ಅಗ್ನಿ ಕಾಷ್ಟದಿಂದ ಇಂಜಿನ್ ಸಾಗುವುದಕೆ

ಕೊಪ್ಪಳದಿಂದ ಗಾಡಿ ಒಳ್ಳೆ ಸಪ್ಪಳದಿಂದ ಓಡುವಾಗ ಅಪ್ಪ ಕೇಳ್ರಿ ಸ್ಟೇಷನ್ನಿನ ಹೆಸರ
ಹುಲಗಿಲಿಂದ ಹೊಸಪೇಟೆ ಗಾದಿಗನೂರು ತೋರಣಗಲ್ಲು ದರೋಜಿ ಕುಡತಿನಿ ಎಂಬ ಊರ
ಎಂದು ನೋಡಿದಿಲ್ಲ್ರಿ ನಾವು ಮುಂದ ಬಂತು ಬಳ್ಳಾರಿ ಕಂಟೋನ್ಮೆಂಟು ದಂಡಿಪೇಟ ಎಂಬ ಹೆಸರ
ಏನು ಶುದ್ದ ಬಂಗ್ಲೆಗಳು ಕಾಣಸ್ತಾವ್ರಿ ಕಣ್ಣಿಗೆ ಶಾಂಪಿನಂಗಡಿ ಪಗಡಿಸಾಲು ಬಜಾರ

ಕಂಡಕಂಡಲ್ಲಿ ಹಾರಿಕೋತ ಚಂಡನಾಮಕ ಬಂಡಿ ನಿಂತಿತು ಅಲ್ಲೊಂದು ಜರ್ರ
ಕಿಂಡಿಯೊಳಗೆ ನೋಡಿ ನನಗೆ ಉಂಡಗೆ ಆಯಿತಲ್ರಿ ದುಂಡು ಟೋಪಿ ಇಟ್ಟುಕೊಂಡ ಸಾಹೇಬರ
ಅರ್ಧ ತಾಸು ಮೀರಿದ ಮೇಲೆ ಗರ್ಜಿಲಿಂದ ಹಿಂದಕ್ಕೆ ಸಮ ಮುಂದಕ್ಕೆ ನಡೆದಿತು ಭರರರರ
ಕತ್ತಲು ಬಿತ್ತಲು ಕಣ್ಣಿಗೆ ಮುಂದೆ ದೀಪದ ಬೆಳಕು ಅದರ ಹಿಂದೆ ಇರಬೇಕ್ರಿ ಬಹಳ ಹುಷರಿಂದ
ಟಿಕೀಟು ಕೇಳುವರು ಬಂದು ಬಂದು ಸಾಲುಗೊಂಡು ಮಾಲೊಂಡು

ರೋಲ್ ಮೇಲೆ ನಿಂತಿರುವಾಗ ಕೀಲಿ ಹಾಕಿ ಮುತಂತಿ ಮಾಡೂವರು ಟೈಮು ಸರಿಯಾಗಿ
ಗಾಡಿ ಸ್ಟೇಷನ್ ಮೇಲೆ ನಿಂತಿರುವಾಗ ಬಹಳ ಬಹಳ ಜನ ಬಂದು ಹತ್ತುವರು
ಎತ್ತರವಾದ ಗಾಡಿ ಮೇಲೆ ಒತ್ತರದಿಂದ ಜನ ಹೋಗಿ ತತ್ರ ಬಿತ್ರ ಮಾಡಿ ಹೋಗಿ ಕೂಡುವರು
ಎತ್ತ ನೋಡಿದರು ಗಾಡಿ ಜತ್ತವಾಗಿ ನೋಡಿ ನಿಂತಿರುವುದು ಹತ್ತೆನಂದರ ಖಾಲಿ ಇಲ್ಲ ಭರ್ಪೂರ

ಆರು ಗಂಟೆ ಬಡಿದ ಮೇಲೆ ಪಾರು ಆಯಿತಲ್ರಿ ಗಾಡಿ ದಾರ ಕಣ್ಣಿಗೆ ಕಾಣಸ್ತೋಯಿತು ಬಹಳ ದೂರ
ಹಗರಿ ಸಾಲು ದಾಟಿದ ಮೇಲೆ ಕಾರಿಕಲ್ಲ ವೀರಪುರ ಬೇವಿನಾಳು ಬಂಟನಾಳು ಎಂಬ ಊರ
ಗುಂತಕಲ್ಲು ಜಂಕ್ಷನ್ನಿಗೆ ಎಂಥ ಜಲ್ದಿ ಬಂದೆವಲ್ರಿ ಕುಂತು ಕುಂತು ಇರೋದ್ರಾಗೆ ಚಮತ್ಕಾರ
ಜಂಕ್ಷನ್ ನೋಡಿ ನನಗ ದಂಗು ಬಡೆದಂತಾಯಿತಲ್ರಿ ಭಂಗಿ ಕುಡಿತಂತಾಯಿತಲ್ರಿ ಎಚ್ಚರ.

ನಗೆಹನಿಗಳು

ಬೆಳಕು

ಬೆಳಕು

ಟೀಚರ್: ಶಬ್ದ ಮತ್ತು ಬೆಳಕುಗಳಲ್ಲಿ ಯಾವುದು ವೇಗವಾಗಿ ಚಲಿಸುತ್ತದೆ?
ಮೋಹನ: ಬೆಳಕು
ಟೀಚರ್: ಅದನ್ನು ಹೇಗೆ ಸಿದ್ಧಪಡಿಸುತ್ತಿಯ?
ಮೋಹನ: ಮಿಂಚಿದಾಗ ಅದು ನಮಗೆ ಮೊದಲು ಕಾಣುತ್ತದೆ ನಂತರ ಗುಡುಗು ಕೇಳುತ್ತದೆ.
ಟೀಚರ್: ಸರಿ
ಗುಂಡ: ನನಗನಿಸುತ್ತದೆ ಶಬ್ದವೇ ಬೆಳಕಿಗಿಂತ ವೇಗವಾಗಿ ಚಲಿಸುವುದು.
ಟೀಚರ್: ಅದು ಹೇಗೆ?
ಗುಂಡ: ನಮ್ಮ ಮನೆಯಲ್ಲಿ ನಾನು ಜನರೇಟರ್ ಶುರು ಮಾಡಿದಾಗ, ಮೊದಲು ಶಬ್ದ ಬರುತ್ತದೆ, ನಂತರ ಬೆಳಕು ಬರುತ್ತದೆ

!!

ಲಂಡನ್ನಿನಲ್ಲಿ
ಭಿಕ್ಷೆ ಬೇಡಲೂ ಸಹ
ಬೇಕು ಲೈಸೆನ್ಸು
ಕಟ್ಟಬೇಕು ಟ್ಯಾಕ್ಸು.

?೨

ಕಣ್ಣುಗಳು ಮೂರುಂಟು ಮುಕ್ಕಣ್ಣನಲ್ಲ
ಮೈ ಬಣ್ಣ ಬದಲಿಸುವುದು ಊಸರವಳ್ಳಿಯಲ್ಲ
ಬಣ್ಣ ಬದಲಾದಂತೆ ಜಗ ನಿಂತು ನಡೆಯುವುದು
ಬಲ್ಲವರು ಗುಟ್ಟಿದನರಿತು ಪೇಳುವರಲ್ಲ.

ಟ್ರಾಫಿಕ್ ಲೈಟು.

ಒಗಟುಗಳು

?೧
?೨

ನೀಲುಗಳು

ಪಳಿಯೊಳಿಕೆ
ಚಂಡಾಟ
!!

ಚಂಡಾಟ

ಚಂಡನಳೆದಾಡಿದ ದಾಂಡಿಗ
ಚಂಡಾಡಿ ಗಂಡುಗಲಿಯಾದ
ಚಂಡಿಗನಳೆದಾಡಿದವ
ಚರಂಡಿ ಪಾಲಾದ.

ಪಳಿಯೊಳಿಕೆ

ಮನವನುತ್ಖನಿಸಿದರೆ
ಸಿಗುವವು ಮತ್ತೆ ಮತ್ತೆ
ಅವೇ (ನೆನ)ಪಳಿಯೊಳಿಕೆಗಳು.

?೧

ಬಾಯಲ್ಲಿ ಜನರನುಗುಳಿ ನುಂಗುವುದು
ಮುಚ್ಚಿದ ಬಾಯ ಕಚ್ಚಿ ಓಡುವುದು
ಬಾಯಲ್ಲದ ಬಾಯಲ್ಲಿ ಮಾತನಾಡುವುದು
ನೆಲದ ಬಾಯೊಳು ಮುಳುಗಿ ಮಾಯವಾಗುವುದು.

-ಲಂಡನ್ ಟ್ಯೂಬ್ ಟ್ರೈನು

ತಳಮಳ

ವೇಷಾವೇಷಗಳ ದೇಶಾದ್ವೇಷಗಳ
ಕಡಲ ಒಡಲಿನೊಳಗೆ
ಕಂಡಿತೇನದು ಕಾಣದೇನದು
ಕಣ್ಣ ಕಣ್ಣುಗಳಿಗೆ.

ನೀವು ನಿಮ್ಮಗಳ, ತಮ್ಮ ತಾವುಗಳ
ಕಡೆಗೆ ನಡಿಗೆ ಕೊನೆಗೆ
ಗಳಿಕೆಗಳಿಕೆಗಳ ಸಿಕ್ಕರೆಣಿಕೆಗಳ
ತಳಮಳವೇ ಮಳಮಳವು.

ಕಳೆಗಳಿಗೆ ಕತ್ತಿ, ಬೆಳೆಗಳಿಗೆ ಬುತ್ತಿ
ಕೊಡದೆ ಕೊಡದು ಫಲವು
ತೊರೆ ತೊರೆಯದೆ ತನ್ಹುಚ್ಚ ತಾನು
ಎಲ್ಲೆಲ್ಲೋ ಹೊಯ್ತು ಕೊಚ್ಚಿ.

ತಾನೆ ತನುವಿಗೆ ಎಲ್ಲೆ
ಎಲ್ಲಿ ಮನಕೆ ಎಲ್ಲೆ
ಮಾನ ಮನಕೆ ಮೌನವೇ ಅಲ್ಲೆ.

ರಾಧೆ

ನೀನಾರು ಸರದಾರ
ನಾ ನೀನಿತ್ತ ಮುತ್ತು
ನೀನೂರು ಹರದಾರಿ
ನಾನಿತ್ತ ಕನಸ ಹೊತ್ತು

ನೀನುಕ್ಕು ನಾನದಿರು
ನಾನಧರ ನೀಮಧುರ
ನೀತೇಜ ನಾತಾವರೆ
ಚಂದಿರನೀ ನಾತಾರೆ

ನಾರಾಧೆ ನೀನಿರದೆ
ನೀನರ್ಧ ನಾನರ್ಧ
ತಾವಿರದೆ ನಾವಿದ್ದರೆ
ಇದ್ದರೇನಿರದಿದ್ದರೇನ್?

ಉಗಮಗಾನ

ಹರಿದಿದೆ ನಾದದ ನದಿ ನಿರಂತರ
ಆದಿಯ ಒಡಲಿನಿಂದುಗಮಿಸಿ
ಕರಗಿದೆ ತಾನ ಜಗವು ತಾ ಹಿಗ್ಗಿದಂತೆ

ದಿನವಿರದೆ ಇರುಳಿರದೆ ಗಳಿಗೆಗಳ
ಗಣಿಸದೆ ಗಮನಿಸದೆ ಕಾಲಗಳ
ಅರಿವಿರದೆ ಪರಿವಿರದೆ ಇತಿಮಿತಿಗಳ
ಮೀರದಂತೆ ಮುಗುಚಿ ಮಲಗಿತ್ತು ವಿಶ್ವ.

ಕಾಲ ಮಲಗಿತ್ತು ಶೂನ್ಯದ ಮಡಿಲಲ್ಲಿ
ಗಾನ ಮಲಗಿತ್ತು ಮೌನದೊಳಗೆ
ರಾಗವೇನಿರದೆ ಜಗವು ಶವವಾಗಿರಲು
ನಾದ ತಾ ಮೆಲ್ಲಗೆ ಮೈ ಮುರಿಯುತ್ತಿತ್ತು.

ಅಮೃತ ಗಳಿಗೆ ಸಿಡಿಸಿತು ಜಗಕೆ
ಜೀವದಾನ ನಾದದುದಯ ದಿನದ
ನೃತ್ಯಾರಂಭ ಸಂಭ್ರಮಗಾನ
ಅರಳಿಮತ್ತರಳಿ ಹರಿಯಿತು ನಾದದ ನದಿ.

ತನನ ತಾನ

ತನನ ತಾನ ತಂತಾನ
ಅವನೀಗೆ ಇವನು ಬಂದಾನ
ನಾನಿಂದ ಕಂದನೆಂದಾನ
ಅಳತಾನ ಒಳಗ ನಗತಾನ

ನೆನೆಸ್ಯಾನ ಒಲವ ಹರಿಸ್ಯಾನ
ಕನಸೀಗೆ ನನಸ ಬೆಸೆದಾನ
ಮೆನಸೀಗೆ ಕನಸ ಹೊಸದಾನ
ಕರೀತಾನ ಒಳಗ ಕಿರಿತಾನ

ಭೋಗ ಭಾಗಿಸಲಿ, ಗುಣ ಗುಣಿಸಲಿ
ಯೋಗ ಕೂಡಲಿ, ಕೊಳಕ ಕಳಿಯಲಿ
ಅರಿವನರಸಲಿ ಬೆಂದು ಬೆಳೆಯಲಿ
ಇಂದಿನಿಂದೆಂದು ನಂದದಿರಲಿ
ತಾನ ತನ್ನಿಂತಾನ ನಿನಾದವಾಗಲಿ.

ಓಕುಳಿ

ಕೊಲ್ಲು ಕೊಲ್ಲೆನುತಾ
ಕೊಚ್ಚಿಹಾಕು ನೀನೆನುತ
ರೊಚ್ಚಲಿ ಚಿಮ್ಮಿಸಿ ಚೆಲ್ಲಿದರಯ್ಯೋ
ನೆತ್ತರೋಕುಳಿಯ.

ಮುಸುಲ ನೀನೆನುತಾ
ಅಸಲು ಮನುಜನಲ್ಲೆನುತ
ಕುಲವನಳಿಸಿ ಕುಣಿಯೆಂದೆನುತ
ಚೆಲ್ಲಿದರೋಕುಳಿಯ.

ಮುಂದಕಿನ್ನೆಂದೂ
ಹಿಂದು ನಂದಿಬಿಡಲೆಂದು
ಗುಂಡಿಗೆ ಬಗೆದು ಚೆಲ್ಲಿದರಯ್ಯೋ
ನೆತ್ತರೋಕುಳಿಯ.

ಟೆರೆರೆಂದು ಕಿರುಚಿ
ಖರೆಯ ಎಡೆಬಿಡದೆ ತಿರುಚಿ
ಸದ್ದಾಮದ್ದ ಮೂತಿಯ ತೋರಿ
ಎರಚಿದರೋಕುಳಿಯ.

ಕಾರು ಬಾರೆನುತ
ಬೋರು ಒಲ್ಲೆ ಲೈಫೆನುತ
ಹೋಮಿ-ಸುಯಿಸೈಡೆಂದೆನುತ
ಚೆಲ್ಲಿದರೋಕುಳಿಯ.

ಅಳಿಯದೆ ಉಳಿವವರು
ಜಗದಿ ಯಾರಯ್ಯಾ ಇಹರು
ಜಗದ ಜನಕನ ನಾಮದಿ ನಿತ್ಯ
ನೆತ್ತರೋಕುಳಿಯೊ.

ಬರಿ(Bury)

ಬರಿ ಬರಿ ನೀ ಬರಿ ಬರಿ
ಅರಳು ಹುರಿದ್ಹಾಂಗ ಹುರಿದು ಬರಿ
ನೀರು ಹರಿದ್ಹಾಂಗ ಹರಿದು ಬರಿ
ಎಲ್ಲಾ ಅರಿತ್ಹಾಂಗ ನುರಿತು ಬರಿ
ಬರಿ ಬರಿ ನೀ ಬರಿ ಬರಿ

ಮನದ ಕಥೆಯಾ ನೀ ನೋಡಿ ಬರಿ
ಕತೆಗಾರ ಹೇಳಿದ್ದನ್ನ ಕೇಳಿ ಬರಿ
ನಟನು ನಟಿಸಿದ್ಹಾಂಗ ನಟಿಸಿ ಬರಿ
ಜನಕೆ ಬೇಕೆನಿಸಿದ್ಹಾಂಗ ಜನಿಸಿ ಬರಿ
ಬರಿ ಬರಿ ನೀ ಬರಿ ಬರಿ

ಬರ ಭಾವಕ್ಕ ಬರದೆ ಬರೆದೇ ಬರಿ
ಬರಿದಾಗೂತನ ಭರ ಭರ ಬರಿ
Bury ಮಾಡೂತನ ಛಲ ಬಿಡದೆ ಬರಿ
ನಾಕ ನರಕ ಮರೆತು ಇಲ್ಲೆ ಇದ್ದು ಬರಿ
ಬರಿ ಬರಿ ನೀ ಬರಿ ಬರಿ.

ನಮ್ಮ ಜಗ

ಇರಲಿರಾಕಿಲ್ಲ ಇರಾಕಿಲ್ಲ
ನರನರಕೆಲ್ಲ ಇಲ್ಲಿರಾಕಿಲ್ಲ

ಸದ್ದಾಮದ್ದುಗುಂಡ ಕೂಡಿಹ
ನೆಂದು ಬುಸ್ ಬುಸ್ಗುಟ್ಟಿ ಕಾರಿ
ಹದ್ದು ಮೀರಿ ಯುದ್ಧ ಸಾರಿ
ಉದ್ದ ತಿಳಿಯದೆ ಹೊಳೆಗೆ ಹಾರಿ

ಸುಳ್ಳ ಕಂತೆಯೇ ಸತ್ಯವೆಂದು
ಕಳ್ಳಮನಸ್ಸಿಗೆ ತಿಳಿಸಿ ಹೇಳಿ
ಬೆಳ್ಳ ಸೇನೆಯ ಕಟ್ಟಿಕೊಂಡು
ದಳ್ಳುರಿಯ ಹಚ್ಚಿದನವನಿಗೆ